ඔන්න කාලෙකින් බ්ලොග් ලෝකේට ආයෙමත් සිතුවිලි දැහැන ගොඩවැඳුනේ නම් නිකම්ම නෙමෙයි සිතුවිලි යාලුවෝ හැමෝටම රසම රස කේක් එකක් බරට බරේ අරගෙනයි.
එන්නෝ ... එන්නෝ ... කේක් කන්න එන්නෝ....!
එහෙනම් අපි වෙනසකටත් එක්ක කේක් කෑල්ලක රස බලලම කතාවට සෙට් වෙමුකෝ යාලුවනේ ....
ඔන්න ඉතින් දැන් ඔයාලා හිතනවා ඇතිනේ එකපාරට හිටි හැටියේ මම බ්ලොගයට කේක් එකක් උස්සන් දුවගෙන ආවේ මොකද කියලා. මෙන්න මේකයි යාලුවනේ අද ඒ කියන්නේ 2013 බක් මාසේ 24 වෙනිදා සිතුවිලි දැහැනට අවුරුද්දක් පිරීමේ සතුට මගේ සිතුවිලි යාලුවෝත් එක්ක බෙදා ගන්න තමයි මම මේ කඩිමුඩියේ දුවගෙන ආවේ.
අහම්බෙන් වගේ ගොඩවැදුන බ්ලොග් ලෝකේට මම එකතු වුනේ හිතු අක්කිගේ බ්ලොග් එකේ (හිතුවක්කාරිගේ හිත) තිබුණ කතාවක් කියවලා ඒකට කමෙන්ටුවක් දාන්න හිතාගෙනයි.
දන්නදා පටන් කවි කතා වලට ආස කරපු මට බ්ලොග් ලෝකේට හිත ගිය එක පුදුමයක් නම් නෙමෙයි. ඔන්න ඔහොම බ්ලොග් ලෝකේට පය ගහපු සිතුවිලි දැහැනට බ්ලොගය නිසා නම් ගොඩක් දේවල් ලැබුණා. ඒ අතරින් වටිනම දේ තමයි සිතුවිලි දැහැනේ විසිරුණු සිතුවිලි එකතු කරපු අහසක් තරම් මගේ ඒ ආදරේ......
හැබැයි ඉතින් මෙහෙම ලස්සන බ්ලොගයක් හදා ගන්න මුලින්ම මට උදව් කලේ නම් මගේ සිත්තමී අක්කියා (සිහින සිත්තම්) තමයි. හැමදාම මගේ කවි කතා සිතුවිලි යාලුවන්ට කලින් බැලුවෙත් සිත්තමී අක්කි තමයි. පෝස්ට් එකක් දාන්න කලින් ලඟට ගිහින් සිය පාරක් විතර බලන්න කිය කියා කන් කෙදිරි ගාලා සිත්තමී අක්කිගෙන් හැමදාම බැනුම් ඇහුවේ නම් නැහැ. හේ.. හේ.. කොහොම වුනත් සිතුවිලි දැහැනට මේ ගමන එන්න උදව් කරපු මගේ සිත්තමී අක්කිට නම් ගොඩක්ම ගොඩක් ස්තූතීයි..!
ඒ වගේම හැමදාම මගේ කවි සිතුවිලි වල අඩුපාඩු පෙන්නලා ලස්සනම ලස්සන කවියකින් අමතක නොකරම කමෙන්ටුවක් දාන දිනේෂ් අයියවත් (වර්ණ) බ්ලොග් ලෝකය ගැන කියලා දුන්න සිත්තමී අක්කි වගේම ලස්සන සිතුවිලි මවන්න හයියක් දුන්න රෙප් අයියවත් (රෙපාගේ අම්බලම) සිතුවිලි දැහැනේ හැම පෝස්ට් එකක්ම වගේ බලපු මධුරංග අයියවත් (සිතක සංකල්පනා) සිතුවිලි දැහැනට අවුරුද්දක් පිරෙන මේ සතුටු මොහොතේ ගොඩක් ආදරෙන් මතක් කරනවා.
නමින් නොකිව්වත් සිතුවිලි දැහැනත් එක්ක හැමදාම හිටපු සිතුවිලි දැහැනට ආ ගිය සිතුවිලි දැහැනේ සියලුම යාලුවන්ට මගේ ප්‍රණාමය..........
